En Mugardos segue escaseando o gol

Galicia de Mugardos 1-0 C.D. Lemos

Canosa foi o autor do único gol do Galicia de Mugardos onte a tarde ante o Lemos que xogou con 10 durante 80 minutos. O xogador visitante Nabil autoexpulsouse do partido no minuto 12. O rapaz do equipo de Monforte fixo falta a Sanmartín e cando os dous volvian ao xogo, Nabil intentou agredir a Sanmartin e o árbitro non o dubidou. O Lemos pelexou con contundencia durante a primeira metade. O porteiro do Mugardos Oscar tivo duas intervencións claras que salvaron ao conxunto de Germán Amil. O tanto da vítoria chegou dunha xogada de Suso Peña que remata Canosa a gol. Corría o minuto 61 de partido.
O mellor do encontro foi o resultado e o Mugardos sumou 3 puntos de ouro na súa conta particular pero continúa como equipo menos goleador da Preferente.

voltaaria.com

Homenaxe a Amada García no castelo de San Felipe

Hoxe 27 de xaneiro ás 17.00 horas

Un ano máis, e respectando escrupulosamente o desexo da familia de celebrar o acto no día do 72 cabodano do seu fusilamento, a Asociación Cultural Memoria Histórica Democrática súmase ao mesmo e fai un chamamento aos veciños e veciñas, asociacións e representantes públicos de Mugardos, Ferrol e bisbarra para acudir ao castelo de San Felipe.

A ofrenda floral e o acto de homenaxe a esta mugardesa, fusilada hai 72 anos, xunto con outros veciños, por orde dos militares sublevados contra o goberno lexítimo da República, converteuse nun acto que o tempo transformou nun símbolo contra a barbarie do fascismo.

memoriahistoricademocratica.org

O Comité Cidadán de Emerxencia gaña o premio “Admiracions Conservades 2010”

Xacemento romano do Caldoval

O Comité Cidadán de Emerxencia gañou o premio “Admiracions Conservades 2010” outorgado pola Associació Defensa Cívica del Patrimoni Cultural, SOS Monuments, pola defensa da conservación do patrimonio natural, cultural, etnolóxico e arqueolóxico do antigo paraíso da Ría de Ferrol. E, en concreto, por promover a conservación dos depósitos arqueolóxicos de Caldoval e de Promontorio.

Plataforma S.O.S Sitges guanya el premi “Admiracions Conservades 2010”

O Galicia de Mugardos mostrouse pouco intenso ante O Páramo

O Galicia de Mugardos desperdiciou na xornada de onte unha valiosa ocasión para afastarse dos seus perseguidores Flavia, Viveiro e o seu propio verdugo, O Páramo, posto que a escuadra lucense soubo aproveitar as poucas ocasións que tivo enfronte da meta de Óscar para facerse cos puntos. Todo sinalaba a que o Mugardos non estaba pasando polo seu mellor día en canto a acerto refírese, xa que os de Ferrolterra puideron inaugurar o marcador da man de Sanmartín xa no minuto 1 nunha xogada na que xa se cantaba o gol. Con todo, aos quince minutos de arrincar o choque, os locais puxéronse por diante cun tanto de Mariño pola escuadra tras o lanzamento dunha falta directa, o que supuxo un duro golpe para os mugardeses. Na segunda metade, O Páramo colocouse atrás para defender a súa vantaxe, unha estratexia que nesta ocasión funcionou a pesar das múltiples ocasións do Mugardos, aínda que sen excesivo perigo. O equipo local sentenciou o choque da man de Marcos, que acertou a enganchar un centro de Isma.

Diario de Ferrol

Perigo!! gaseiro 82 cargado con GNL para Reganosa

LNG Lagos entrando na ría de Ferrol

Mañá, venres 21 de Xaneiro está prevista a entrada dun novo gaseiro na Ría de Ferrol, trátase do buque "LNG Lagos" un vello gaseiro (con 34 anos de antiguedade) que fará o nº 82, cargado con GNL para a perigosa e ilegal planta de gas de Reganosa.

É por iso, polo que o Comité Cidadán de Emerxencia decide convocar a CONCENTRACIÓN de protesta, mañá venres 21 de xaneiro de 2011, ás 19 hs na Praza Amada García, diante do Edificio Administrativo da Xunta de Galicia, en Ferrol.

Comité Cidadán de Emerxencia

Cinco empresas optan á obra do servizo de spa na piscina mancomunada

Cinco empresas optan á realización das obras para dotar de servizo de spa na piscina climatizada que comparten os municipios de Ares e Mugardos.
A resolución do concurso convocado entre ambas as administracións resolverase nos próximos días, tendo en conta que, segundo adiántase desde o consistorio de Mugardos, as previsións pasan por levar a contratación da obra ao pleno previsto para a última semana do presente mes.
Como se recordará, a proposta económica ascende a 100.000 euros anuais e o compromiso, por parte da adxudicataria, cuantifícase en máis de 123.000 euros, como mínimo.
Por outra banda, cabe recordar que, tras o proceso de contratación e a aprobación do asunto por parte da corporación correspondente, a empresa disporá unicamente dun mes de prazo para a entrada en funcionamento do servizo.
De ser así, tal e como se apunta desde o Concello de Mugardos, a nova instalación deportiva tería que estar operativa no mes de marzo. A piscina climatizada que comparten Ares e Mugardos está en Franza.

Diario de Ferrol

Alternativa Galeguista reúne aos afiliados do BNG que causaron baixa no partido

Só unhas horas despois de se dar de baixa no BNG, o movemento crítico xurdido na agrupación frentista de Mugardos xa está mans á obra ca fin de dar forma oficial ás súas inquietudes políticas.
Alternativa Galeguista irrumpe así no panorama político do municipio con miras a facerse un oco nas eleccións municipais convocadas para o mes de maio.
Anxos Díaz Prados, antiga edila de Benestar no goberno de Xosé Fernández Barcia e unha das voces máis críticas coa liña política seguida polo BNG nos últimos anos, tamén pasa agora a ser a imaxe máis coñecida dun proxecto que “nace para defender os dereitos da cidadanía” e que reúne a un grupo de persoas “que teñen unha maneira diferente de entender a política”, aseverou Prados.
Así, cuestións como a identidade, a transparencia e a participación que, no seu día, centraron as reclamacións dos críticos á sección do BNG liderada polo rexedor municipal convértense na pedra angular dun proxecto político que arrancou onte mesmo coa rúbrica do documento notarial solicitando a súa legalización ao Ministerio de Interior.
O nacionalismo de esquerdas é a liña política dunha nova formación que concorrerá aos próximos comicios municipais, tal e como explicou Anxos Díaz, se ben aínda está por decidir o nome da persoa que representará á formación na mencionada cita electoral. Será unha decisión que se tomará a partires do consenso dos afiliados, segundo se apuntou dende unha formación que, a día de hoxe, reúne a un total de 14 persoas.
A convocatoria da reunión tamén é unha cuestión que se resolverá en próximas datas, tal e como se apunta desde a actual dirección dunha formación aínda en cernes.

Díaz definiu o proxecto como unha maneira diferente de entender a política

Diario de Ferrol

O gasoduto de Arteixo permitirá unir Reganosa coa refinería de Repsol

gasoduto no rio eume

O Consello da Xunta aprobou onte o proxecto sectorial de incidencia supramunicipal do gasoduto de Arteixo, que discorre integramente por ese concello e terá unha lonxitude de 1.149 metros. A Xunta destacou que o desenvolvemento desta infraestrutura, cun investimento próximo ao medio millón de euros, reforzará a rede gasista do noroeste e flexibilizará e mellorará a seguridade do conxunto do mallado básico de gasodutos. Feijoo subliñou que con este paso a Xunta desbloquea un gasoduto que permitirá conectar Arteixo cun dos gasodutos de Reganosa e que levará o gas á refinería de Repsol.

A Voz de Reganosa

Emilio Bruquetas asume a dirección de Reganosa co reto da súa ampliación

Bruquetas forma parte de Reganosa desde o inicio do proxecto

Reganosa completou onte o proceso de renovación do seu mapa accionarial iniciado a pasada primavera, ao nomear ao ferrolán de 36 anos Emilio Bruquetas como novo director xerente da regasificadora. Formou parte da empresa desde a fase de lanzamento do proxecto e desempeñara a dirección de planificación e control e tamén a de administración. O nomeamento de Emilio Bruquetas á fronte da planta -onde substitúe a Mariano Lacarta- segue a liña dos últimos cambios societarios, nos que o Grupo Tojeiro e a Xunta, que agora ostentan o 36,5% e o 17,5% do capital, respectivamente, ampliaron a súa presenza para reforzar a galeguidade da empresa. Unión Fenosa Gas, Sonatrach e o fondo First State completan o accionariado.

A Voz de Reganosa

O cheiro a marihuana é de Reganosa

O estudo encargado polo Concello de Ferrol para aclarar a procedencia do estraño cheiro, similar ao da marihuana, que periodicamente se percibe na cidade desde hai máis de tres meses, comezou a dar os seus froitos. A análise das catas conseguiu identificar a sustancia que provoca este fenómeno: os mercaptanos. Trátase dun composto que, segundo distintas fontes, mestúrase co gas para facilitar a detección de posibles escapes.

Planta de gas

Aínda que polo momento o Concello declinou precisar con máis exactitude a orixe dunhas vaharadas que se puideron percibir de novo esta semana -tanto en distintos puntos do centro de Ferrol como na zona rural- a información indica que a orixe podería estar relacionado coa planta de gas de Reganosa en Mugardos.
Así o apuntan todos os indicios, como a coincidencia da aparición do cheiro sempre con ventos do suroeste e a chegada de gaseros á ría. E tamén o uso para o que se aplica a sustancia en cuestión, presente tamén na marihuana e de aí, a similitude co cheiro que en determinados momentos se detecta na cidade.
Algúns cidadáns comezaron a percibir este cheiro a finais de setembro, que volveu reproducirse na primeira semana de outubro. A expectación suscitada polo estraño fenómeno e a preocupación xerada fixo que o Concello encargase a realización dunha serie de catas, a pesar de que a administración local aclarou que era unha cuestión fóra da súa competencia.

A Voz de Reganosa

O Galicia de Mugardos volveu co peto cheo de terras composteláns

O Galicia de Mugardos poido sacar algo positivo do seu partido ante o Bertamiráns no Concello de Ames.
O conxunto de Germán Amil gañou por 1 a 2 e volveu co peto cheo de terras composteláns. O Mugardos segue no medio da clasificación con 22 puntos.

O Mugardos foi superior os primeiros 45 minutos e aproveitouse dunha defensa local que non soubo sacar o balón de primeiras desde a súa área. Así chegou o penalti tras unha derriba de Chechu a un rival que o colexiado Queija Domínguez non dubidou en sinalar. Grueiro non fallou desde os once metros e adiantou ao seu equipo. Non tardaron en encarrilar o choque tras varios rexeites da defensa local que deixou o balón morto a Rebolo para que fusilase a Agustín (0-2). Román maquillou o resultado antes do final da primeira parte, minuto 41, ao rematar un balón bombeado.

Bertamiráns: Josua, Jacobo, Juanjo (Genelo, min.80), Chechu, Jose María, Iván, Alfonsito (Chacho, min.78), Román, Luís, Espiño e Toñito.

Galicia de Mugardos: Agustín, Rubén, Jorge, Adrián, Sanmartín, Juan, Oscar (Suso Pena, min. 72), Seco, Rebolo (Maikel, min. 80), Grueiro (Anxo, min. 89) e Vituco (Puchi, min. 85).

Árbitro: Queija Domínguez (Ourense). Mostrou cartón amarelo aos visitantes Rubén, Juan, Rebolo e Grueiro.

Goles: 0-1, min. 25: Grueiro, de penalti. 0-2, min. 28: Rebolo. 1-2, min. 41: Román.

Campo: Municipal de Bertamiráns. 100 espectadores.

voltaaria.com

O Concello de Mugardos alerta sobre o posible derrubamento da fachada do antigo cine Zárate

Ideal Cinema Zárate

O antigo cine Zárate de Mugardos presenta unha deterioración tan evidente na súa fachada que o Concello teme que se derrube parte da estrutura principal do edificio. Así llo fixo saber o alcalde do municipio, o nacionalista Xosé Fernández Barcia, á Xunta, que se comprometeu, en virtude dun convenio asinado en decembro do 2006, a transformar o monumento nun centro de día. Desde o Goberno galego aseguraron que habilitarán unha partida para tratar de facer fronte aos problemas do emblemático inmoble, pero aínda non hai unha data concreta para que comecen os traballos de consolidación.
«Se non actúase pode haber perdas irreparables no edificio», aseguraba hai poucos días o rexedor mugardés despois de manter un encontro de traballo con responsables do Executivo autonómico.

O convenio

A idea de construír no cine Zárate un centro de día empezou a xestarse a finais do 2006, cando o bipartito arrincaba o seu goberno na Xunta. Por aquel entón, o vicepresidente, Anxo Quintana, e o conselleiro de Industria, Fernando Branco, visitaron Mugardos para ver de primeira man o estado no que se atopaba o emblemático edificio e asinar un convenio de colaboración a tres bandas polo que o Concello se comprometía a negociar a compra do inmoble e a redactar o proxecto e a contratación das obras para levar a cabo a iniciativa. Pola súa banda, os diferentes departamentos do Goberno galego que se vían implicados nesta transformación achegarían o financiamento para que se convertese nunha realidade.
Con todo, o proceso se desaceleró pola necesidade dunha modificación puntual no Plan Xeral de Ordenación Municipal (PXOM) que permitía catalogar o chan que ocupa o cine Zárate como dotacional. Sen este cambio o Concello víase obrigado a actuar de forma conxunta en toda a mazá. Esta traba non se superou ata o ano pasado. [Ler máis]

A Voz de Reganosa

O Galicia de Mugardos coquetea co descenso

Galicia de Mugardos 0-0 C.D. Castro

O Galicia de Mugardos de Germán Amil esbarou hoxe. Non foi capaz de vencer ao colista, o Castro, na Pedreira, nin sequera de facerlle o gol e o partido rematou co 0-0. A falta de goles no Mugardos é preocupante , de feito, é o menos goleador da categoría.

Arestora colócase na 15ª posición, cun escaso colchón de 3 puntos sobre os postos de descenso que marca o Viveiro. Tócalle seguir traballando a Germán Amil.

Galicia de Mugardos: Agustín; Juani, Jorge, Adrián Martínez, Sanmartín, Manel, Puchi (Máikel, m.46), Diego Seco (Grueiro, m.46), Óscar Pérez, Juan Jesús e Vituco (Rebolo, m.75).

Castro: Adrián Valín; Ferreiro, Pablo, Andón, Ruso, Edu, Máikel (Iago, m.79), Elías (Saavedra, m.90), Uxío, Lea e Eloy (Héctor, m.58).

Árbitro: Ruibal Argibay (Pontevedra). Mostrou cartón amarelo a Sanmartín, Manel e Óscar Pérez no Galicia de Mugardos; e a Edu e Máikel no Castro.

Incidencias: Encontro disputado no campo da Pedreira, en Mugardos, ante aproximadamente 150 espectadores.

Voltaaria.com

Diario de Ferrol

elprogreso.galiciae.com

Primeiro gaseiro do ano 2011

LNG "Iberica Knutsen" entrando na Ría (16/08/2010)

Anuncian a entrada na Ría, do buque gaseiro “Iberica Knutsen” , coa súa perigosa carga para Reganosa. De entrar, serían 81 os metaneiros cargados con GNL-LNG, os que puxeran en perigo a toda a poboación da contorna da Ría de Ferrol.
Unha vez máis o corrupto e perigoso despropósito gasístico, amosa o seu portencial destrutivo coa entrada na Ría dun novo gaseiro. Se xa de por si a Planta de Gas, instalada no corazón da nosa Ría, é moi perigosa, cando entra un gaseiro na Ría, esta perigosidade aumenta exponencialmente. O gaseiro ten que sortear un sinuoso, longo, estreito e pouco caudaloso canle de entrada. E só pode entrar cando se dan unhas condicións meteorolóxicas determinadas. Nengún buque -grande ou pequeno- pode estar navegando pola Ría. A menos de 200 metros non pode estar outro buque ou embarcación, só os dos práticos, Guardia Civil e remolcadores. @s mariscadores teñen que paralizar as súas faenas. Logo a operación de descarga do gas, converte-se, durante horas, nunha auténtica bomba de reloxería que até que esta non acaba, o perigo de accidente é enorme. Ante calquer hipotético accidente que se producira no complexo, o buque tería que saír a mar aberto polos seu propios medios. É por iso polo que sempre emproa cara a boca da Ría e hai un ou dous remolcadores encostados mentras dura a descarga do perigoso fluído. Mais ante a imposibilidade de saír a mar aberto, a Autoridade Portuaria, designou un lugar para o buque que sería o fondeadeiro de Santa Lucia, a 400 m da Planta -frente as casas baratas de Mugardos- e que, ademais, non ten o calado suficiente para alberga-lo.

Todo o mundo sabe, e sobre todo os seus promotores, que esta planta nunca se debeu instalar dentro da Ría. Mais a codicia duns poucos, que xa o teñen todo, e a ambición persoal de falsos e mequetrefes e a corrupción política, permitiron semellante despropósito. Por outra banda a planta ve-se inecesaria, os datos son contundentes, traballa baixo mínimos, até algunha vez ten posto en perigo o propio sistema, tendo que intervir a xestora gasística no seu auxilio. Doe que sexa o diñeiro de tod@s nós, o diñeiro público o que teña que manter todo este despróposito.

Diante do anuncio da chegada do, xa coñecido, LNG “Iberica Knutsen”, o Comité Cidadán convoca nova acción de denuncia e protesta: CONCENTRACIÓN, este Lúns 3 de xaneiro de 2011, ás 7 da tarde, na Praza Amada García, diante do Edificio Administrativo da Xunta de Galicia.

Antes de que suceda unha catástrofre

Comité Cidadán de Emerxencia

ferrolsuso.blogspot.com

Colectivo Ártabra 21